Сульфацил натрия-DF (Альбуцид) 30% 10 мл капли глазные

Сипаттама

Дәрілік затты медициналық қолдану жөніндегі нұсқаулық

Натрий сульфацилі

Саудалық атауы

Натрий сульфацилі

Халықаралық патенттелмеген атауы

Сульфацетамид

Дәрілік түрі

20% және 30% 5 мл көзге тамызатын дәрі

Құрамы

1 мл препарат құрамында

белсенді зат – 200,0 мг және 300,0 мг натрий сульфацетамиді,

қосымша заттар: натрий тиосульфаты, инъекцияға арналған су.

Сипаттамасы

Түссіз, мөлдір немесе сәл сарғыш сұйықтық

Фармакотерапиялық тобы

Сезім мүшелерінің ауруларын емдеуге арналған препараттар. Көз ауруларын емдеуге арналған препараттар. Микробқа қарсы препараттар. Сульфонамидтер. Сульфацетамид.

АТХ коды S01АВ04

Фармакологиялық қасиеттері

Фармакокинетикасы

Көз тіндеріне өтеді, онда өзінің бактерияға қарсы спецификалық әсерін көрсетеді. Көбінесе жергілікті әсер етеді, бірақ препараттың бір бөлігі қабынған конъюнктиваға сіңіп, жүйелі қан ағымына түседі. Препараттың жүйелі қан ағымына түсетін мөлшері қайта енгізу кезінде сенсибилизациялауға жеткіліксіз. Жергілікті қолданғанда сульфаниламидтер Cmах мәніне мөлдір қабықта (3 мг/мл жуық), алдыңғы камера ылғалында (0,5 мг/мл жуық) және нұрлы қабықта (0,1 мг/мл жуық) тамызудан кейінгі алғашқы 30 минутта жетеді. Аздаған мөлшері (0,5 мг/мл аз) көз алмасы тіндерінде 3-4 сағат бойы сақталады. Мөлдір қабықтың эпителий зақымдануында сульфаниламидтер пенетрациясы күшейеді.

Фармакодинамикасы

Микробқа қарсы бактериостатикалық дәрі, сульфаниламид. Әсер ету механизмі ПАБҚ-мен бәсекелі антагонизммен, дигидроптероатсинтетаза бәсеңдеуімен, пуриндер мен пиримидиндер синтезіне қажетті тетрагидрофолий қышқылы синтезінің бұзылуымен жүзеге асады. Нуклеин қышқылдарының (ДНҚ және РНҚ), бактериялық жасушаның синтезі бұзылады және олардың көбеюі тежеледі.

Грамоң және грамтеріс кокктарға, Escherichia coli, Vibrio cholerae, Clostridium perfringens, Bacillus anthracis, Corynebacterium diphtheriae, Yersinia pestis, Chlamydia spp., Actinomyces is-raelii, Toxoplasma gondii қатысты белсенді. Сульфацетамидке төзімділік дамуы мүмкін.

Қолданылуы

Сульфацетамидке сезімтал микроорганизмдер туғызған қабақтың, конъюнктиваның, мөлдір қабықтың, тамырлы қабық алдыңғы бөлігінің және көз жасы ағатын жолдар ауруларын кешенді емдеуде.

Көру мүшелерінің күйіктері мен жарақаттарын кешенді емдеуде инфекциялық асқынулар профилактикасына арналған.

Қолдану тәсілі және дозалары

Конъюнктива қалтасына тамызады: ересектерге күніне әр 2-3 сағат сайын 30% ерітіндінің 1-2 тамшысы; 2 айлықтан 2 жасқа дейін күніне 4 рет 20% ерітіндінің 1 тамшысы, 2 жастан бастап күніне әр 4 сағат сайын 20% ерітіндінің 2 тамшысы. Доза жай-күйдің жақсаруына қарай күніне 3-4 ретке дейін азайтылады.

Емдеу курсы 7-10 күн.

Жағымсыз әсерлері

- қысқа мерзімді ашыту, көзден жас ағу, көздің қызаруы, шаншып ауыруы, қышынуы, тамызудан соң көрудің өткінші бұлыңғырлануы, спецификалық емес конъюнктивит, асқын инфекцияның дамуы, сульфаниламидтерге ауыр аллергиялық реакциялар (Стивенс-Джонсон синдромы, уытты эпидермолиз, шұғыл дамитын бауыр некрозы, агранулоцитоз, аплазиялық анемия)

- жергілікті аллергиялық реакциялар.

Қолдануға болмайтын жағдайлар

• сульфаниламидті препараттарға, препарат компоненттеріне жоғары сезімталдық
• 2 айға дейінгі балалар

Дәрілермен өзара әрекеттесуі

Прокаин, тетракаин, новокаин, дикаин, анестезин және гентамицинмен бірге қолдану бактериостатикалық әcерін төмендетеді. ІАСҚ, салицилаттар, дифенин сульфацилдің уыттылығын күшейтеді. Тікелей әсер етпейтін антикоагулянттармен қолданғанда соңғыларының спецификалық белсенділігі артады. Күміс тұздарымен үйлесімсіз. Хлорамфениколмен бір мезгілде қолдану соңғысының жағымсыз әсерінің даму қаупін арттырады. Cульфацил натрийді мырыш сульфатымен бірге қолданғанда ерітіндінің шөгуі болуы мүмкін.

Айрықша нұсқаулар

Препаратты тура көздің алдыңғы камерасына енгізуге болмайды.

Тамшылатқыш құтының ұшын ластап алмау керек.

Фуросемид, тиазидті диуретиктер, сульфонилмочевина туындылары немесе карбоангидраза тежегіштеріне жеке сезімталдығы жоғары пациенттер сульфацетамидке жоғары сезімталдық танытуы мүмкін.

Сульфацетамидке сезімтал емес микроорганизмдер, сондай-ақ зең флорасы шектен тыс өсуі мүмкін.

Бөлінді мөлшері көп болғанда парааминобензой қышқылы концентрацияларының жоғары болyымен бактерияға қарсы белсенділіктің төмендеуі.

Аллергия симптомдары білінген жағдайда, сондай-ақ ауыру және инфекциялық-қабыну үдерісінің басқа белгілері күшейгенде, іріңді бөлінді мөлшері көбейгенде емді тоқтату қажет.

Жүктілік және лактация кезеңі

Жүктілік, бала емізу кезінде жеткілікті қолдану тәжірибесі жоқ. Егер күтілетін емдік әсері болуы мүмкін жағымсыз әсерлердің даму қаупінен асып түссе, сульфацетамидті емдеуші дәрігердің тағайындауымен жүкті әйелдерді және бала емізетін аналарды емдеуге қолдануға болады. Сульфаниламидтер плацента арқылы және емшек сүтіне өтеді. Жүктілік кезінде аналары сульфаниламидтердің таблетка түрлерін қабылдаған жаңа туған нәрестелерде ядролық сарғаю дамуы мүмкін, сондықтан көзге тамызатын дәрі түрінде сульфаниламид қабылдағанда сарғаюдың даму қаупін жоққа шығару мүмкін емес.

Көлік құралын немесе қауіптілігі зор механизмдерді басқару қабілетіне әсер ету ерекшеліктері

Тамызудан кейін көздің бұлыңғырлануы дамыған жағдайда анық көру қалпына келгенше көлік құралдарын басқарудан және жоғары зейін шоғырландыруды және психомоторлық реакциялар шапшаңдығын талап ететін аса қауіпті қызмет түрлерімен шұғылданудан бас тарту қажет.

Артық дозалануы

Препараттың артық дозалану деректері жоқ.

Шығарылу түрі және қаптамасы

Алғашқы ашылуы бақыланатын қақпақтармен герметикалық тығындалған полиэтиленнен жасалған тамшылатқыш құтыларда 5 мл.

Медициналық қолдану жөніндегі мемлекеттік және орыс тілдеріндегі нұсқаулықпен бірге 1 құтыдан қораптық картоннан жасалған қорапшаға салынады.

100, 20 немесе 10 қорапшадан картон қорапқа салынады.

Немесе 20, 100 немесе 500 құты (қорапшаға салынбаған) медициналық қолдану жөніндегі мемлекеттік және орыс тілдеріндегі нұсқаулықтармен бірге құтылар санына қарай қораптық картоннан жасалған қорапқа салынады.

Сақтау шарттары

Жарықтан қорғалған жерде, 25 ⁰С-ден аспайтын температурада сақтау керек.

Қаптаманы ашқан соң – 4 аптадан көп емес.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецептісіз

Өндіруші/Қаптаушы

«Медоптик» ЖШС, Қазақстан Республикасы

Алматы қ., Огарев к-сі2 «б»

тел.: 8 (727) 2320822, 2320823, 2320824

факс: 8 (727) 3832202

Е-mail: medoptik@medoptik.kz, www.medoptic.kz

Тіркеу куәлігінің иесі

«Медоптик» ЖШС, Қазақстан

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын, дәрілік заттың тіркеуден кейінгі қауіпсіздігін қадағалауға жауапты ұйымның мекенжайы

«Медоптик» ЖШС, Қазақстан Республикасы

Алматы қ., Огарев к-сі2 «б»

тел.: 8 (727) 2320822, 2320823, 2320824

факс: 8 (727) 3832202

Е-mail: medoptik@medoptik.kz, www.medoptic.kz

Дәріханалар