Клабел 250 мг, №14, табл.

Сипаттама

Дәрілік затты медициналық қолдану

жөніндегі нұсқаулық

КЛАБЕЛ^® 250

Саудалық атауы

КЛАБЕЛ^® 250

Халықаралық патенттелмеген атауы

Кларитромицин

Дәрілік түрі

Үлбірлі қабықпен қапталған таблеткалар, 250 мг

Құрамы

Бір таблетканың құрамында

белсенді зат – 250.00 мг кларитромицин

қосымша заттар: натрий кроскармеллозасы, желантинделген крахмал, сусыз коллоидты кремнийдің қостотығы (Аэросил 200), повидон, стеарин қышқылы, магний стеараты, тальк, микрокристалды целлюлоза

үлбірлі қабық: қабыққа арналған материал (Опадри ақ 26Н280000), пропиленгликоль

үлбірлі қабықтың құрамы Опадри ақ 26Н280000: HPMC 2910/гипромеллоза 15 ср, HPMC 2910/ гипромеллоза 6 ср, титанның қостотығы Е171, пропиленгликоль, гидроксипропилцеллюлоза, полисорбат 80, сорбин қышқылы FCC, ванилин.

Сипаттамасы

Клабел^® 250 – ақ түсті үлбірлі қабықпен қапталған, ұзынша пішінді, бір жақ бетінде сызығы және басқа жақ бетінде «NOBEL» деген жазуы бар таблеткалар.

Фармакотерапиялық тобы

Жүйелі қолдануға арналған инфекцияға қарсы препараттар.
Жүйелі қолдануға арналған бактерияға қарсы препараттар. Макролидтер, линкозамидтер және стрептограминдер. Макролидтер. Кларитромицин.

АТХ коды J01FA09

Фармакологиялық қасиеттері

Фармакокинетикасы

Ішке қабылданғаннан кейін кларитромицин асқазан-ішек жолынан тез сіңеді. Абсолюттік биожетімділігі 50%-дан 55%-ға дейін. Кларитромицин қан плазмасының ақуыздармен 70%-ға байланысады. 45 мкг/мл концентрацияда байланысу дәрежесі 41%-ға дейін төмендейді. Бұл емдік концентрациядан бірнеше есе артық концентрацияларда ғана байқалады. Тамақпен бір мезгілде қабылдау кларитромициннің сіңуінің аздап баяулауына және ең жоғары шектегі концентрацияға жету уақытының 2 сағаттан 2.5 сағатқа дейін артуына әкеледі. Препаратты әрбір 8 - 12 сағат сайын 500 мг дозада қабылдағанда жартылай шығарылу кезеңі 5 - 7 сағатқа дейінді құрайды.

Кларитромициннің 15-20%-ы өзгермеген күйінде, 10-15%-ы негізгі метаболит 14-гидроксикларитромицин түрінде несеппен шығарылады.

Фармакодинамикасы

Кларитромицин макролидтер тобына жататын жартылай синтетикалық антибиотик болып табылады. Әсер ету механизмі бактериялық жасушада ақуыз синтезінің басылуы болып табылады. Кларитромициннің аэробты, анаэробты, грамоң жәнет грамтеріс бактериялардың кең ауқымына қатысты белсенділігі жоғары.

Клабел^® 250 препараты келесі микроорганизмдерге қатысты белсенді:

Аэробты грамоң микроорганизмдер: Staphylococcus aureus, Streptococcus pneumoniae, Streptococcus pyogenes, Listeria monocytogenes.

Аэробты грамтеріс микроорганизмдер: Haemophilus influenzae, Haemophilus parainfluenzae, Moraxella catarrhalis, Neisseria gonorrhоeae, Legionella pneumophila.

Басқа микроорганизмдер: Mycoplasma pneumoniae, Chlamydia pneumoniae.

Микобактериялар: Mycobacterium leprae, Mycobacterium kansasii, Mycobacterium chelonae, Mycobacterium fortuitum, Mycobacterium avium complex, құрамында Mycobacterium avium, Mycobacterium intracellulare барлар

Бета-лактамазалардың өндірілуі кларитромициннің тиімділігіне ықпалын тигізбейді.

Стафилококтердің метициллин- және оксациллинрезистентті штаммдарының көбісі кларитромицинге сезімтал емес.

Helicobacter: Helicobacter pylori.

Қолданылуы

- тыныс алу жолдарының төменгі бөлігінің инфекцияларында (бронхит, пневмония және т.б.);

- тыныс алу жолдарының жоғарғы бөлігінің инфекцияларында (синусит, фарингит және т.б.);

- терінің және жұмсақ тіндердің инфекцияларында (фолликулиттер, целлюлиттер, эризипелоид және т.б.);

- Mycobacterium avium немесе Mycobacterium intracellulare әсерінен туындаған диссеминацияланған немесе орныққан микобактериялық инфекцияларда, Mycobacterium chelonae, Mycobacterium fortuitum, Mycobacterium kansasii әсерінен туындаған орныққан инфекцияларда;

- CD₄-лимфоциттер саны ≤ 100/мм³, АИТВ инфекциясын жұқтырған пациенттерде Mycobacterium avium кешені (МАК) әсерінен туындаған диссеминацияланған инфекцияларға профилактика жүргізу үшін;

- омепразол немесе ланзопразол әсер ететін тұз қышқылының секрециясы бәсеңдегенде, он екі елі ішектің ойық жарасы бар пациенттерде H. рylori-ді эрадикациялау үшін (бейтарап рН-та, қышқыл рН-қа қарағанда, кларитромициннің H. pylori қарсы белсенділігі жоғары).

Қолдану тәсілі және дозалары

Ересектер және 12 жастан асқан балалар үшін тыныс алу жолдарының төменгі бөлімінің, тыныс алу жолдарының жоғарғы бөлімінің инфекцияларында, терінің және жұмсақ тіннің инфекцияларында КЛАБЕЛ^® 250 препаратының ұсынылатын дозасы күніне екі реттік 250 мг құрайды, өте ауыр инфекцияларда дозаны күніне екі рет қабылданатын 500 мг-ге дейін арттырады. Ересектер үшін әдеттегі емдеу ұзақтығы 5-14 күнді құрайды (ауруханадан тыс пневмонияда және синуситтерде курсы6 – 14 күнді құрайды). КЛАБЕЛ^® 250 препаратын тамақ ішуге қарамай қолдана беруге болады.

Микобактериялық инфекциялар

Микобактериялық инфекциясы бар ересектер үшін ұсынылатын доза тәулігіне 2 рет 500 мг құрайды. ЖИТС-пен ауыратын науқастарда диссеминацияланған MAC-инфекцияларды емдеу клиникалық және микробиологиялық әсер көрсетілгенге дейін жалғастырылуы тиіс. Кларитромицинді микобактерияларға қарсы басқа препараттармен біріктіріп қолданған жөн. Туберкулездік емес микобактериялық басқа инфекцияларды емдеуді емдеуші дәрігердің шешімімен жалғастырған жөн.

MAC профилактикасына арналған доза: кларитромициннің ұсынылатын дозасы ересектерде тәулігіне 2 рет 500 мг құрайды.

Он екі ел ішектің ойық жарасы бар пациенттерде (ересектер) H. pylori эрадикациялау үшін: H. рylori-инфекциясы әсерінен туындаған пептикалық ойық жарасы бар пациенттерде, H. рylori эрадикациялау жөніндегі ұлттық немесе халықаралық нұсқауларға сәйкес, 7-14 күн бойы кларитромициннің тәулігіне 2 рет 500 мг дозасы микробтарға қарсы қажетті басқа препараттармен және протонды помпа тежегіштерімен біріктіріп тағайындалуы мүмкін.

Бүйрек функциясының жеткіліксіздігі бар пациенттерге қолдану: бүйрек функциясының ауыр жеткіліксіздігі бар (креатинин клиренсі < 30 мл/мин.) пациенттерде дозаны түзету қажет болады. Дозаны екі есеге, яғни күніне бір реттік 250 мг-ге немесе өте ауыр инфекцияларда күніне екі реттік 250 мг-ге азайту керек. Емдеу ұзақтығы 14 күннен аспауы тиіс.

Балалар

Клабел^® 250 препаратын 12 жасқа дейінгі балаларға қолдану зерттелген жоқ.

Жағымсыз әсерлері

Ересектерді және балаларды емдегенде ең жиі және таралған жағымсыз реакциялар іштің ауыруы, диарея, жүректің айнуы, құсу және дәмнің бұзылуы болып табылады. Осы жағымсыз реакциялар орташа айқын сипатта болады және макролидтік антибиотиктердің белгілі қауіпсіздік бейініне сәйкес келеді. Кларитромицинмен байланысты немесе байланысты болуы мүмкін жағымсыз реакциялар туындау жиілігі бойынша бөлінген.

Жиі

(≥ 1/100-ден <1/10 дейін)

- ұйқысыздық, бас ауыру

- дисгевзия (дәм сезімінің бұзылуы), дәмнің бұзылуы

- вазодилатация

- жүректің айнуы, іштің ауыруы, құсу, диспепсия, диарея

- бауырдың функциональді тестілерінің қалыптан ауытқуы

- бөртпе, гипергидроз

Жиі емес

(≥ 1/1000-нан <1/100 дейін)

-целлюлит, кандидоз, гастроэнтерит

-инфекция, қынаптық инфекциялар

- лейкопения, нейтропения, тромбоцитемия, эозинофилия

- анафилактоидтық реакциялар, аса жоғары сезімталдық

- анорексия, тәбеттің төмендеуі

- үрейлену, күйгелектік

- есінен айырылу, дискинезия, бас айналу, ұйқышылдық, тремор

- бас айналу, естудің нашарлауы, құлақтың шуылдауы

- жүректің тоқтап қалуы, жүрекшелер фибрилляциясы, ЭКГ-де QT аралығының ұзаруы, экстрасистолия, пальпитация

- демікпе, мұрыннан қан кету, өкпе қантамырларының эмболиясы

- эзофагит, гастроэзофагеальді рефлюкс ауруы, гастрит, прокталгия, стоматит, глоссит, іштің кебуі, іш қату, ауыз ішінің құрғауы, кекіру, метеоризм

- холестаз, гепатит, АЛТ, АСТ, ГГТ дегейлерінің жоғарылауы

- буллезді дерматит, қышыну, есекжем, макулопапулёзді бөртпе

- бұлшықет спазмдары, қаңқа-бұлшықеттің сіресуі, миалгия

- қан креатининінің жоғарылауы, қан мочевинасының жоғарылауы

- дімкәстік, қызба, астения, кеуденің ауыруы, қалтырау, шаршау

- альбумин-глобулин арақатнасының өзгеруі, қан сарысуында сілтілік фосфатаза деңгейінің жоғарылауы, қан сарысуында лактатдегидрогеназа деңгейінің жоғарылауы

Жекелеген мәлімдемелер

- жалған жарғақшалы колит, тілме қабыну

- агранулоцитоз, тромбоцитопения

- анафилаксиялық реакциялар, ангионевроздық ісіну

- психоздар, сананың шатасуы, деперсонализация, депрессия, бағдардан адасу, галлюцинациялар, қорқынышты шым-шытырық түстер көру, мания

- бұлшықет түйілуі, агевзия, паросмия, аносмия, парестезия

- естімей қалу

- пируэтті қарыншалық тахикардия (torsades de pointes), қарыншалық тахикардия, геморрагиялар

- жедел панкреатит, тіл түсінің өзгеруі, тіс түстерінің өзгеруі

- бауыр функциясының жеткіліксіздігі, гепатоцеллюлярлық сарғаю

- Стивенс-Джонсон синдромы, уытты эпидермальді некролиз, эозинофилиямен және жүйелік көріністермен (DRESS) қатар жүретін дәрі- дәрмектік тері реакциясы, акне

-рабдомиолиз (кейбір мәлімдемелерде кларитромицинді рабдомиолизбен астасатыны белгілі басқа да дәрілік препараттармен (статиндер, фибраттар, колхицин немесе алопуринол сияқты) бір мезгілде қолданғанда рабдомиолиздің туындағаны мәлімделген), миопатия

- бүйрек функциясының жеткіліксіздігі, интерстициальді нефрит

- халықаралық қалыптасқан қатынастың жоғарылауы, протромбин уақытының артуы, несеп түсінің өзгеруі.

Кларитромицинді тәуліктік 1000 мг дозада қабылдаған, ЖИТС бар науқастарда және иммунитетін төмендеген басқа да жағдайлары бар пациенттерде өте жиі жағымсыз әсерлер жүректің айнуы, құсу, дәмнің бұзылуы, іштің ауыруы, диарея, бөртпе, іштің кебуі, бас ауыру, іш қату, естудің нашарлауы, қан сарысуында АСТ және АЛТ мөлшерінің жоғарылауы болды. Жиі емес: диспноэ, ұйқысыздық және ауыз ішінің құрғауы. Иммунитетінің төмендеу жағдайлары орын алған пациенттерде қалыптағы шамадан едәуір айырмашылықтары бар аталған зертханалық көрсеткіштердің маңызына талдау жасалды, мынадай деректер алынды: күніне 1000 мг кларитромицин қабылдаған пациенттердің 2–3%-да, АСТ және АЛТ деңгейлерінің едәуір жоғарылағаны және қандағы лейкоциттер мен тромбоциттер санының едәуір төмендегені байқалды. Пациенттердің аздаған бөлігінде сондай-ақ қандағы мочевина мөлшерінің жоғарылағаны байқалды.

Қолдануға болмайтын жағдайлар

- макролидтер тобының антибиотиктеріне немесе қосымша заттардың біреуіне аса жоғары сезімалдық

- мына препараттармен: астемизолмен, цизапридпен, пимозидпен, терфенадинмен (өйткені бұл QT аралығының ұзаруына және, қарыншалық тахикардияны, қарыншалардың фибрилляциясын және пируэтті қарыншалық тахикардияны (torsade de pointes) қоса, жүрек аритмияларының дамуына әкелуі мүмкін), эрготаминмен немесе дигидроэрготаминмен (өйткені бұл қастауыш алкалоидтарымен улануға әкелуі мүмкін), CYP3A4-пен едәуір дәрежеде метаболизденетін ГМГ-КоА-редуктаза тежегіштерімен (статиндермен), ловастатинмен, симвастатинмен (рабдомиолизді қоса, миопатия қаупінің жоғарылауымен байланысты); пероральді түрде қолданылатын мидазоламмен; тикагрелормен немесе ранолазинмен бірге тағайындау

- CYP3A4 күшті тежегіштерімен, колхицинмен бір мезгілде қолдану

- бүйрек функциясының жеткіліксіздігімен қатар жүретін бауыр функциясының ауыр жеткіліксіздігі бар пацинеттерге

- анамнезде QT аралығы ұзарған (QT аралығының туа біткен немесе жүре пайда болғаны анықталған ұзаруы), қарыншалық жүрек аритмиясы (қарыншалық тахикардияның «пируэт» типін (torsades de pointes) қоса)

- гипокалиемия (QT аралығының ұзару қаупі)

- 12 жасқа дейінгі балаларға

- жүктілік, лактация кезеңі

Дәрілермен өзара әрекеттесуі

Цизапридті, пимозидті, астемизолды және терфенадинді КЛАБЕЛ^® 250 препаратымен бір мезгілде қолдану, қарыншалық тахикардияны, қарыншалардың фибрилляциясын және екі бағыттық тахикардияны қоса, QT аралығын және аритмияны арттырады.

Кларитромицинді және эрготаминді немесе дигидроэрготаминді бірге қолдану қастауыштың, орталық жүйке жүйесіне әсерін қоса, қантамырлардың спазмы, аяқ-қолдардың және басқа да тіндердің ишемиясы түріндегі уытты әсеріне әкеледі.

КЛАБЕЛ^® 250 препаратын ГМГ-КоА-редуктаза тежегіштерімен (статиндер), ловастатинмен немесе симвастатинмен бірге қабылдауға болмайды, өйткені олар CYP3A4-пен едәуір дәрежеде метаболизденеді, соның нәтижесінде олардың плазмдағы концентрациялары артады, осыған байланысты миопатияның және рабдомиолиздің даму қаупі ұлғаяды. Егер КЛАБЕЛ^® 250 препаратын қабылдау міндетті түрде болса, онда КЛАБЕЛ^® 250 препаратын қолдану кезінде ловастатинді немесе симвастатинді қабылдауды тоқтатады.

Егер КЛАБЕЛ^® 250 препараты мен статиндерді бір мезгілде қолданбасқа болмайтын болса, онда метаболизмі CYP3A-ға тәуелді емес статинді, мысалы, флувастатинді тағайындау мүмкіндігін қарастыру керек. Статиннің ең төмен ықтимал дозасын жазып тағайындау ұсынылады. Пациенттерде миопатия белгілерін және симптомдарын бақылау қажет. Кларитромицинді аторвастатинмен немесе розувастатинмен бірге қолданғанда пациенттерде рабдомиолиздің дамығаны жөнінде сирек мәлімделді. Бір мезгілде қолданған жағдайда аторвастатиннің немесе розувастатиннің дозасын барынша көбірек төмендету қажет. Статиннің дозасын түзетуге немесе метаболизмі CYP3A-ға тәуелді емес статинді (мысалы, флувастатин немесе правастатин) қолдануға қатысты тиісті шешім қабылдануы тиіс.

CYP3A индукцияланатын препараттар (мысалы, рифампицин, фенитоин, карбамазепин, фенобарбитал, шайқурай) кларитромициннің метаболизмін жылдамдатуы мүмкін, бұл кларитромицин концентрациясының және оның тиімділігінің төмендеуіне әкеледі. Бұдан басқа, кларитромициннің CYP3A-ға тежегіш әсер етуі салдарынан жоғарылауы мүмкін CYP3A-мен индукцияланатын басқа да дәрілік заттардың деңгейін бақылау қажет. Рифабутинді және КЛАБЕЛ^® 250 препаратын бір мезгілде қабылдау рифабутин деңгейінің жоғарылауына және сарысудағы кларитромицин концентрациясының төмендеуіне, сондай-ақ увеит қаупінің жоғарылауына әкелетіні белгілі.

Эфавиренц, невирапин, рифампицин, рифабутин және рифапентин, P450 цитохромының метаболизмдік жүйесінің күшті индукторлары ретінде, кларитромициннің метаболизмін жылдамдатады және оның плазмадағы концентрациясын төмендетіп, бір мезгілде оның белсенді метаболитінің (14-OH-кларитромицин) концентрациясын арттырады, бұл қалаған емдік әсерге қол жеткізуге кедергі жасауы мүмкін.

Этравиринді қабылдағанда кларитромициннің экспозициясы төмендейді, ал оның белсенді метаболиті - 14-OH-кларитромициннің концентрациясы жоғарылайды. 14-OH-кларитромицин микобактериялар кешеніне (МАС) қарсы азырақ тиімді зат болғандықтан, препараттың осы патогенге қатысты тиімділігі өзгеруі мүмкін. Осы себепті, MAC емдеу үшін альтернативті емдеу нұсқаларын қарастырған жөн.

Флуконазолмен бірге қолданғанда белсенді метаболит 14-ОН-кларитромициннің тепе-тең концентрациялары айтарлықтай өзгерген жоқ. КЛАБЕЛ^® 250 препаратының дозасын түзету қажет емес.

200 мг ритонавирді әрбір сегіз сағат сайын және КЛАБЕЛ^® 250 препаратын әрбір 12 сағат сайын бір мезгілде қабылдау кларитромицин метаболизмінің елеулі төмендеуіне әкеледі. Бүйрек функциясының жеткіліксіздігі бар пациенттерде дозаны түзету қажет: креатинин клиренсі (КК) 30–60 мл/мин болғанда КЛАБЕЛ^® 250 препаратының дозасын 50%-ға, КК < 30 мл/мин болғанда 75%-ға төмендету қажет. Күніне 1 г-ден артық дозадағы КЛАБЕЛ^® 250 препаратын ритонавирмен бірге қолданбаған жөн.

КЛАБЕЛ^® 250 препаратының басқа дәрілік препараттарға ықпалы

Кларитромицинді хинидинмен немесе дизопирамидпен бір мезгілде қабылдағанда екі бағыттық тахикардия жағдайлары байқалды. Сондықтан QT аралығының ұзаруын дер кезінде анықтау үшін ЭКГ-мониторинг жүргізу және осы препараттардың қан сарысуындағы концентрацияларын бақылау ұсынылады.

КЛАБЕЛ^® 250 препаратын және пероральді гипогликемиялық дәрілерді және/немесе инсулинді біріктіріп қолдану айқын гипогликемияны туындатуы мүмкін. Натеглинид, пиоглитазон, дезопиралид, репаглинид және розиглитазон сияқты гипогликемиялық дәрілермен бір мезгілде қолданғанда кларитромицин СYP3A энзимін тежейды, бұл гипогликемияны туындатуы мүмкін. Глюкоза деңгейіне мұқият мониторинг жүргізу ұсынылады.

Пероральді антикоагулянттар

Кларитромицинді варфаринмен бірге қолданғанда күрделі қан кетудің туындау, ХҚҚ (халықаралық қалыптасқан қатынас) көрсеткіштерінің және протромбин уақытының едәуір жоғарылау қаупі бар. Пациенттер кларитромицин мен пероральді антикоагулянттарды бір мезгілде қабылдап жүргенге дейін ХҚҚ көрсеткішін және протромбин уақытын жиі бақылау қажет.

КЛАБЕЛ^® 250 препаратын және алғаш CYP3A метаболизденетін кез келген басқа препаратты бірге қолдану соңғысының қан плазмасындағы концентрацияларының жоғарылауына әкеледі және оның емдік әсерін және жағымсыз реакцияларын күшейтеді немесе ұзартады.

КЛАБЕЛ^® 250 препаратын дәрілік заттар – CYP3A субстраттарын заттарын қабылдап жүрген пациенттерге, әсіресе егер соңғыларының емдік ауқымы тар (мысалы, карбамазепин) және/немесе осы энзиммен экстенсивті түрде метаболизденсе, абайлап қолданған жөн.

КЛАБЕЛ^® 250 препаратын (күніне 3 рет 500 мг) омепразолмен (күніне 40 мг) бірге қолданғанда омепразолдың плазмалық концентрациялары артады. КЛАБЕЛ^® 250 препаратымен бірге қолданғанда фосфодиэстераза тежегіштерінің (силденафилдің, тадалафилдің және варденафилдің) плазмалық концентрациялары артуы мүмкін, бұл фосфодиэстераза тежегіштерінің дозасын азайтуды қажет етуі мүмкін.

КЛАБЕЛ^® 250 препаратымен бірге қабылдағанда айналымдағы теофиллин және карбамазепин концентрациясы артады.

CYP2D6-сыз пациенттерде метаболизм CYP3A арқылы жүреді, сондықтан осы популяцияда CYP3A бәсеңдеуі толтеродиннің плазмалық концентрацияларының едәуір жоғарылауына әкеледі. Мұндай пациенттер үшін толтеродин дозасын төмендету оны КЛАБЕЛ^® 250 препаратын сияқты CYP3A тежегіштерімен бірге қолданғанда қажет болуы мүмкін.

Мидазоламды және КЛАБЕЛ^® 250 препаратын бірге қабылдауға болмайды.

Мидазоламды КЛАБЕЛ^® 250 препаратымен бірге вена ішіне қолданғанда дозаны дер кезінде түзету үшін пациенттің жай-күйіне мұқият мониторинг жүргізу керек.

CYP3A метаболизденетін, триазолам мен альпразоламды қоса, басқа да бензодиазепиндерді қолданған кезде сол сақтық шараларын орындаған жөн. Элиминациясы CYP3A-мен (темазепам, нитразепам, лоразепам) байланысты емес бензодиазепиндер үшін КЛАБЕЛ^® 250 препаратымен клиникалық тұрғыдан маңызды өзара әрекеттесулердің болуы екіталай.

КЛАБЕЛ^® 250 препараты мен триазоламды бірге қолданғанда, ОЖЖ тарапынан фармакологиялық әсерлердің артуы мүмкін екендігін ескеріп, пациенттерді бақылаған жөн.

КЛАБЕЛ^® 250 препараты мен басқа да отоуытты препараттарды, әсіресе аминогликозидтерді бірге қабылдауды сақтықпен тағайындау керек.

КЛАБЕЛ^® 250 препаратын және колхицинді бір мезгілде қолданған жағдайда кларитромицинмен p-гликопротеиннің және CYP3A тежелуі колхицин экспозициясының артуына әкелуі мүмкін. Пациенттерде колхицинмен уыттанудың клиникалық көріністерін бақылау қажет. Бауыр және бүйрек функциясы қалыпты пациенттерде КЛАБЕЛ^® 250 препаратымен бір мезгілде қабылдағанда колхицин дозасын төмендету қажет. Бауыр және бүйрек функцияларының жеткіліксіздігі бар пациенттерде КЛАБЕЛ^® 250 препаратын және колхицинді бірге қабылдауға болмайды.

КЛАБЕЛ^® 250 препаратын дигоксинмен бірге қабылдаған пациенттердің қан сарысуында дигоксин концентрациясының жоғарылағаны, дигиталистік уыттану, соның ішінде потенциалды фатальді аритмиялардың белгілері анықталды. КЛАБЕЛ^® 250 препаратымен бірге қолданғанда пациенттердің қан сарысуындағы дигоксин концентрацияларын мұқият бақылаған жөн.

КЛАБЕЛ^® 250 препаратының таблеткаларын және зидовудинді бір мезгілде қабылдау АИТВ-инфекциясын жұқтырған ересек пациенттерде зидовудиннің тепе-тең концентрацияларының төмендеуіне әкелуі мүмкін. КЛАБЕЛ^® 250 препараты мен зидовудинді қабылдау арасында 4 сағаттық аралықты сақтау жолымен бұған елеулі дәрежеде жол бермеуге болады.

Фенитоин мен вальпроатты КЛАБЕЛ^® 250 препаратымен бірге қолданғанда олардың сарысудағы деңгейіне талдау жүргізу ұсынылады, осы препараттардың сарысудағы концентрациялары артуы мүмкін.

Кларитромицин және атазанавир CYP3A субстраттары және тежегіштері болып табылады. Осы препараттар арасында екі бағыттық өзара әрекеттесулердің болғанына айғақтамалар бар. КЛАБЕЛ^® 250 (күніне екі рет 500 мг) және атазанавирді (күніне бір рет 400 мг) бірге қолдану кларитромицин экспозициясының екі есе артуына, 14-OH-кларитромицин экспозициясының 70%-ға төмендеуіне және атазанавир AUC 28%-ға артуына әкеледі. Протеаза тежегіштерімен бірге қабылдағанда КЛАБЕЛ^® 250 препаратының дозасы күніне 1000 мг-ден аспауы тиіс.

Артериялық гипотензияның даму қаупі бар болғандықтан, КЛАБЕЛ^® 250 препаратын CYP3A4 метаболизденетін кальций өзектерінің блокаторларымен (мысалы, верапамил, амлодипин, дилтиазем) бір мезгілде қолданғанда сақ болған жөн. Өзара әрекеттескен кезде кларитромициннің де, сонымен қатар кальций өзектері блокаторларының да плазмалық концентрациялары жоғарылауы мүмкін. Кларитромицинді верапамилмен бірге қабылдаған пациенттерде артериялық гипотензия, брадиаритмия және лактоацидоз байқалды.

Итраконазолды КЛАБЕЛ^® 250 препаратымен бірге қолданғанда пациенттер фармакологиялық әсерінің күшею немесе ұзаққа созылу көріністерін және симптомдарын анықтау үшін дәрігердің қалтқысыз бақылауында болуы тиіс, өйткені итраконазолдың плазмалық деңгейі жоғарылауы және керісінше болуы мүмкін.

Кларитромицинді (күніне екі рет 500 мг) және саквинавирді (жұмсақ желатинді капсулалар, күніне үш рет 1200 мг) қабылдау, саквинавирді бөлек қабылдаумен салыстырғанда, саквинавирдің AUC және C_max тепе-тең көрсеткіштерінің 177%-ға және 187%-ға артуын туындатады. Саквинавир мен ритонавирді кларитромицинмен біріктіргенде ритонавирдің кларитромицинмен өзара әрекеттесуі мүмкін екендігіне назар аударған жөн.

Айрықша нұсқаулар

Бактерияларға қарсы барлық дерлік дәрілерді қолданғанда ауырлығы бойынша жеңілден өмірге қауіп төндіретін дәрежеге дейін болуы мүмкін жалған жарғақшалы колит жағдайлары мәлімделді. Демек, бактерияларға қарсы дәрілерді қабылдағаннан кейін ілесе жүретін диарея орын алған пациенттерде осы диагнозға назар аудару маңызды.

Бактерияларға қарсы іс жүзінде барлық препараттарды, соның ішінде кларитромицинді қолданған кезде Clostridium difficile (CDAD) әсерінен туындаған, ауырлығы жеңіл дәрежеден фатальді аяқталатын колитке дейінгі диареяның дамығаны жөнінде мәлімделді. КЛАБЕЛ^® 250 препаратын қабылдап жүрген пациенттерде myasthenia gravis симптомдары күшеюі мүмкін.

Кларитромицинді және колхицинді бірге қолданғанда, әсіресе егде жастағы пациенттерде, соның ішінде бүйрек функциясының жеткіліксіздігі аясында колхицинді уыттылықтың (соның ішінде фатальді аяқталатын) дамығаны жөнінде мәлімделді.

Кларитромицинді триазолам және мидазолам сияқты триазобензодиазепиндермен және басқа да отоуытты препараттармен, әсіресе аминогликозидтермен бірге абайлап қолданған жөн. Вестибулярлық және есту функциясына мониторинг емдеу кезінде және емдеуден кейін жүргізілуі тиіс.

QT аралығының ұзару қаупіне байланысты, КЛАБЕЛ^® 250 препаратын денсаулық жағдайы QT аралығының ұзаруының және torsades de pointes дамуына беталысының жоғарылауымен байланысты пациенттерде сақтықпен қолдану керек.

Ұзаққа созылған жүрек реполяризациясы және QT аралығы жүрек аритмиясының даму қаупіне әкеледі. Сондықтан келесі жағдайларда қарыншалық аритмиялар (жыпылықтағыш аритмияны қоса) үшін қауіптің жоғарылауына әкелуі мүмкін. КЛАБЕЛ^® 250 препаратын жүректің ишемиялық ауруы, жүрек функциясының ауыр жеткіліксіздігі, өткізгіштіктің бұзылулары немесе клиникалық тұрғыдан маңызды брадикардиясы бар пациенттерде сақтықпен пайдаланған жөн. Препаратты гипокалиемиясы бар пациенттерге тағайындамау керек. КЛАБЕЛ^® 250 препаратын астемизолмен, цизапридпен, пимозидпен және терфендинмен бір мезгілде қолдануға болмайды.

Макролидтерге Streptococcus pneumoniae резистенттілігі мүмкін болатындықтан, госпиталдық пневмонияны емдеу үшін КЛАБЕЛ^® 250 препаратын тағайындағанда сезімталдыққа тест жүргізу маңызды. Госпиталдық пневмония жағдайында кларитромицинді сәйкес келетін басқа антибиотиктермен біріктіріп қолдану керек.

Бауыр функциясының бұзылулары бар пациенттерге препаратты абайлап тағайындайды. Бауырдың созылмалы аурулары бар болған жағдайда қан сарысуының ферменттеріне ұдайы бақылау жүргізу қажет. Бауыр функциясының жеткіліксіздігі бар және бүйрек функциясы қалыпты пациенттерде кларитромицинді дозасын түзетпей-ақ қолдануға болады. Алайда бауыр функциясының жеткіліксіздігі қатар жүруінен тыс пациентте бүйрек функциясының ауыр дәрежедегі жеткіліксіздігі (креатинин клиренсі < 30 мл/мин) бар болғанда дозаныекі есеге (күніне бір рет немесе өте ауыр инфекцияларда күніне екі рет 250 мг) азайтқан немесе препаратты қабылдау аралықтарын ұзартқан жөн. Емдеу ұзақтығы 14 күннен аспауы тиіс.

Кларитромицинді және пероральді антикоагулянттарды (варфарин) бір мезгілде қолданғанда қан кетулер қаупі болады. Мұндай жағдайларда халықаралық қалыптасқан қатынасқа (ХҚҚ) және протромбин уақытына бақылау жүргізген жөн.

Кларитромицинді және гипогликемиялық препараттарды/инсулинді қолдану елеулі гипогликемиямен қатар жүруі мүмкін, осыған байланысты қандағы глюкоза деңгейіне мониторинг жүргізу ұсынылады.

Жүктілік

Жүктілік кезіндегі кларитромициннің қауіпсіздігі анықталған жоқ. Осы себепті, жүктілік кезінде пайда/қаупі арақатынасын мұқият талдамай, КЛАБЕЛ^® 250 препаратын қолдану ұсынылмайды.

Лактация кезеңі

Емшек емізген кезде КЛАБЕЛ^® 250 препаратын қолданудың қауіпсіздігі жөнінде деректер жоқ. Кларитромицин ана сүтімен бірге шығарылады.

Көлік құралын немесе потенциалды қауіпті механизмдерді басқару қабілетіне дәрілік препараттың ықпал ету ерекшеліктері

Препараттың жағымсыз әсерлерін ескеріп, автомобильді және потенциалды қауіпті мехаизмдерді басқарғанда сақтық танытқан жөн.

Артық дозалануы

Симптомдары: жүректің айнуы, құсу, іштің ауыруы, диарея, психикалық жағдайдың өзгеруі, параноидальді мінез-құлық, гипокалиемия және гипоксемия.

Емі: асқазанды дереу шаю және симптомдық ем.

Гемодиализ және перитонеальді диализдің тиімділігі аз.

Шығарылу түрі және қаптамасы

Поливинилхлоридті үлбірден және баспалы алюминий фольгадан жасалған пішінді ұяшықты қаптамада үлбірлі қабықпен қапталған 5 немесе 7 таблеткадан.

Пішінді 1 (7 таблеткалық) немесе 2 (5 немесе 7 таблеткалық) қаптама медициналық қолдану жөнінде мемлекетттік және орыс тілдеріндегі нұсқулықпен бірге өндіруші фирманың голограммасы бар картон қорапшаға салынған.

Сақтау шарттары

25ºС-ден аспайтын температурада, құрғақ, жарықтан қорғалған жерде.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші/Тіркеу куәлігінің иесі

«Нобел Алматы Фармацевтикалық Фабрикасы» АҚ

Қазақстан Республикасы

Алматы қ., Шевченко к-cі 162 Е.

Тұтынушылардан дәрілік заттың сапасы жөніндегі шағымдарды Қазақстан Республикасы аумағында қабылдайтын, тіркеуден кейін дәрілік заттың қауіпсіздігін бақылауға жауапты ұйымның атауы, мекенжайы және байланыс жасау деректері (телефон, факс, электронды пошта):

«Нобел Алматы Фармацевтикалық Фабрикасы» АҚ

Қазақстан Республикасы, Алматы қ., Шевченко к-cі 162 Е.

Телефон нөмірі: (+7 727) 399-50-50

Факс нөмірі: (+7 727) 399-60-60

Электронды поштасы: nobel@nobel.kz

Дәріханалар

Қалалар